獨家│咖喱為追夢辭職醫生 認有男友唔怕流失Fans

ViuTV《全民造星IV》2號黃雅慧（咖喱），現年27歲，因為覺得英文名Kelly讀音與「咖喱」相似，所以用咖喱這個花名來參賽。本身在公立醫院完成實習不久，被安排到屯門醫院做了約兩個月內科醫生，就看到《造星IV》這個追夢機會，於是毅然辭職。她透露當初想做醫生，是因為一次有家人入ICU，感到無能為力，而決心要讀醫幫人。至於參加《造星IV》，因她覺得時間不等人，如果將來升讀專科，怕再推遲追夢決定，變得更沒膽嘗試。


大方公開戀情

咖喱除得到同事和家人支持，男友亦十分支持她追夢，但她坦言男友亦有所顧慮：「佢擔心我冇接觸過呢個圈子，驚啲人如果係咁鬧我，我會唔會承受唔到，佢擔心我心靈會受傷，所以佢本身都唔係咁鍾意，但佢知我想做呢樣嘢，其實都好支持我。」

與從事IT行業的男友拍拖數年，雖感情穩定，但暫未談婚論嫁：「呢啲仲好長遠，要慢慢睇。」亦未怕公開戀情會流失粉絲：「我覺得男朋友屬於私生活，我都希望粉絲可以接受。如果接受唔到，始終我同男友有段長時間經營嘅關係，我冇理由話即刻同佢分手，冇可能！已經有個感情建立嘅時候，我都相信如果係粉絲都會諒解。」

樣殘因兩邊兼顧

咖喱參加比賽後，其實都有留意網上評論，對於有網民指她的樣子很殘，她解釋：「啲人成日話我第一round個樣好攰，因為當時雖然辭咗職，但都需要時間通知，當時好多日冇瞓覺，兩邊一齊平衡，所以我一早辭咗職，我覺得係個好選擇，因為對兩邊都唔好。」現在專注比賽，她笑言有足夠休息，樣子明顯精神得多，雖然比賽都有辛苦之處，但跟做醫生相比，確實輕鬆不少，更稱做過醫生令她在這比賽較優勝之處，就是比其他參賽者更捱得。

自知性格固執

咖喱於《造星IV》中初亮相，就因為見義勇為的性格，搞到製作組好難做。曾多次在其他參賽者崩潰爆喊時幫手擋鏡頭，有網民大讚她有想法是好事，但亦指她的性格可能不適合入娛樂圈，她則自認性格固執：「就算有冇鏡頭，唔理係咪朋友，可能因為我有自己一套，都有某方面嘅固執。我覺得人哋需要幫助就會去做，同時我都係一個普通人，我好難喺每個角度體恤晒所有人需要，所以我都有同製作組Say Sorry。」

「有嗰句，講嗰句」可能因咖喱是長女，受家庭教育影響，性格與胞妹剛好相反，小時候就非常敢言，自覺不是個怕事的人，喜歡與人溝通，但某程度上心智其實好細個，她形容自己為人好單純。見義勇為又決斷的性格，似乎真的很適合做醫生，而她也想好後路，如果在娛樂圈發展不順利，就會回去做醫生，自覺仍有幫人的使命感。