拳王｜張振朗被爆名符其實NG王兼大喊包

TVB台慶劇《拳王》開播一周，監製陳耀全（Andy）昨晚（26日）率領主演的張振朗及黃子恒開Live，與觀眾互動。Andy笑指今次是決心將振朗與子恒來個性格大兜亂，以帶給觀眾新鮮感，振朗即笑指有難度：「因為個角色好嚴肅、又多內心戲，仲要打好多份工添！對我嚟講真係演得唔算得心應手。我嗰時真係拍到個人都唔同咗，變得唔鍾意講嘢同埋好鍾意諗嘢。」至於由嚴肅變活潑的子恒，則笑指在角色感染下私底下亦變得開朗：「加上劇入面拳館所有人都好似一家人，所以拍得好開心。」
二人又坦承是喊包，子恒指最近一次爆喊是因為聽到劇中一首配樂，然後滿腦子都是海正藍（張振朗飾）的畫面，及拍攝時的所有畫面。至於振朗則坦言無論是見到羅蘭姐（劇中嫲嫲），抑或做訪問談及拍攝感受時，都定必感觸落淚，還被監製踢爆他是劇中NG最多演員。

直播時不少網民留言提及十分喜歡正藍與迎風（黃子恒飾）的互動！其實二人在劇中會逐漸發展成師徒關係，二人的結冤與結緣場口亦相當有趣，竟然是由27.4元的士費、一包花菇以及一個銀包開始！正藍為了27.4元的士費竟追迎風追至入男廁，嚇到肚痛大作的迎風O晒嘴！據知，振朗與子恒這對受歡迎的男男CP之後還會有不少對手戲，二人不但火花四濺，更非常有愛。