黃宗澤「出貓」企高一級搭住身高差一呎糖妹合照變身巨人

2021-11-27 08:30

糖妹（黃山怡）最近跟黃宗澤（Bosco）結戲緣，兩人齊齊拍外景，還邊工作邊自娛。今日Bosco喺IG上載兩張二人合照，看似一本正經嘅Bosco搭住糖妹膊頭，糖妹高度只去到Bosco個心口位置，身高差大，Bosco如同變身巨人搭住個小妹妹咁，相當搞笑。網民再睇真啲，原來Bosco企高咗一級。翻查資料顯示，糖妹身高四呎十一吋，黃宗澤就五呎十一吋，兩人身高差係一呎，加埋黃宗澤「出貓」，兩人身高差更大。

難得Bosco仲忍得到笑，而糖妹雙眼向上射住Bosco給他大姆指，另一張糖妹就單晒眼高舉勝利手勢，還留言：「喂呀大佬！」不過，有網民睇唔過眼，留言叫Bosco唔好欺負妹妹，又指Bosco「出貓」：「落返嚟影過。」糖妹就攞到好多同情票，寫上：「最萌身高差」、「糖妹好可愛」、「糖妹好似細路女」。