獨家│KB瓣數多嘆Tea忙度橋 搞鬼性格惹女友人笑唔停

李健宏（KB、Kevinboy）可以話百足咁多爪，除咗夾Band做鼓手呢樣正職，平時仲有做吓節目主持，又有做經理人，仲要經營YouTube頻道《KidneyBuster》。而YouTube頻道相信係最晒佢腦力嘅業務，事關佢呢個頻道有好多不同題材影片，最受歡迎嘅一定係「情義兩難全之玩爆你個腎」系列。日前本報見到佢同一名相信係同事嘅女子喺天后食Tea，佢都好似好多嘢諗咁，唔知係咪諗緊下次整蠱邊位藝人呢？採訪：梁志明

KB日前晏晝3點左右，同一名女子喺天后一間食燒鵝嘅食店嘆下午茶。二人用餐時全程都冇乜交流，各自睇手機，女方直情戴埋耳機似係睇緊戲，如果唔係一齊落單，真係以為佢哋搭枱。而KB就好似好多嘢諗咁，個樣有啲苦惱。隻手就摸完下巴又摸額頭再摸眼，仲要摸埋個鼻，疫情期間，希望佢有消毒乾淨對手先咁做啦！

後巷陪食煙吹水

KB與同行女子食完嘢就埋單走人，女方仲將收銀員工找嘅錢，遞返畀KB，相信係由KB請客。而KB一食飽就好似叉咗電咁，係咁同個女仔傾偈。二人喺後巷坐低傾多幾句，個女仔就順便食支煙，KB就似乎有啲眼乾要滴吓眼藥水。其間KB唔知講咗啲咩，搞到個女仔笑到打佢，睇嚟KB真係好幽默噃！大概5分鐘後，佢哋就各自離開。