胡定欣遭陳山聰囝囝冷待 出動洗腦歌「Jaco Shark」仍然零反應

胡定欣日前為陳山聰太太Apple慶祝生日，原來當晚仲有一件小插曲。山聰噚日（20日）喺IG上載一段約1分鐘長嘅短片，見定欣好落力氹山聰囝囝Jaco開心，抱住對方，情深款款獻唱係小朋友都鍾意嘅洗腦歌《Baby Shark》改編版，「Jaco Shark do do do,Jaco Shark do do do...」但Jaco完全冇畀反應，只係低下頭，之後定欣再出擊，教唱生日歌畀媽咪聽，Jaco個樣似乎愈來愈驚。最後定欣都忍唔住，用好溫柔嘅語氣問Jaco小朋友：「你可唔可以話畀大家知，點解你會咁對我，你愛我嘅係咪，你愛過我嘅，kiss kiss，親親。」唔講都任你抱，講完Jaco就伸手兼嗌「媽咪」話要走。

山聰就有另一番解說：「大佬從來只會對住一個人咁深情，我真係好想知你哋前世係咩關係，點解今世會係咁 @nwuuu @jaco_chan_aj #情深說話未曾講 #相愛很難 #前世 #大佬嘅眼神 #依段戲做足功課 #jaco #愛的表現 #胡小姐乜又係妳呀。」被冷待嘅定欣死撐到底：「因為冇其他人好似我咁對佢！你，好自為之！」好姊妹姚子羚忍唔住留言：「Jaco話呢位阿嬋你唱完未呀！」，陳敏之亦話：「Jaco心諗補返D唇膏嚟見我。」十分搞笑。