獨家丨撮合張秀文嫁到筍盤林盛斌被朋友電話轟炸要求做媒

2021-11-17 20:42

34D「TVB咪神」張秀文即將閃嫁金融才俊王大權(Billy)成為豪門新抱，今日於IG公開多謝媒人林盛斌(Bob)，Bob接受本報訪問時笑說：「少少心意，不成敬意！」他承認郎才女貎係開心嘅。

重提呢段美滿良緣，他說：「當日情人節同小朋友及家長們去燒烤，突然心血來潮做媒人，分別致電叫兩人出來，原先秀文話已躺在被窩上網玩手機唔想出嚟，我就同佢講『信我，出嚟可以改變到你一生，唔出嚟你會後悔！』之後張秀文化咗少少妝同埋束咗條小辮子出咗嚟，雖然兩個唔係一見鍾情，但都算傾得投契，我仲吩咐男方送女仔回家。之後佢哋開始聯絡及發展。」

對於被指為金牌媒人，阿Bob話唔敢當：「身邊朋友冇另一半，而我又覺得佢人品係幾好嘅，咪紀錄在案安排吓囉！Billy好努力工作，成績做得唔錯；張秀文唔去蒲相當乖女，兩人都幾登對。不過，都試過有啲唔適合例子，唔係個個成功，近年成功嘅仲有玄學家陳定幫、朱慧敏，見佢哋可以開花結果我個心都安樂晒。呢兩日我收到好多圈內及圈外朋友電話提出要求做媒，哈！等我做埋下個月18號嘅棟篤笑《The Bobfather 2021》，之後搞個大型配對gathering！」問到會否演變成媒人生意？他強調呢方面只會講心唔講金，做媒只係一種恩德，正如工作上搵到伯樂一樣。