馬國明榮登鏡後勁麻甩榜首 Bob再次失落第一唔忿氣

遊戲節目《思家大戰》上周日推出的「思家觀眾大戰」TVB台前幕後民調問答遊戲，題目為「講一個鏡頭前幾高質，鏡頭後勁麻甩嘅TVB男藝員」，今午官方網站揭曉終極答案！

是次榮登榜首的男藝員為馬國明，其餘依次為馬德鐘、黎諾懿、鄭嘉穎、何廣沛及林盛斌（Bob）！冠軍得主馬國明眾望所歸，其實早於答案揭曉前，已有大批網民路過投馬國明一票！據幕後工作人員透露，馬明之所以榮登榜首，全因其率性隨意性格：「佢私底下一啲都唔貪靚，有時著件白背心就返工。份人又冇架子喎，成日喺大canteen見到佢自己一個食飯，感覺好似街坊咁，唔講真係唔知佢係做幕前嘅。」

同樣上榜的黎諾懿，則為好友馬國明澄清：「其實馬明一啲都唔麻甩喎，馬明係鍾意踢波咋嘛。馬明喺鏡頭後其實好斯文同好怕醜，尤其一多人或者有女仔喺度。」談到自己上榜原因，黎諾懿大方表示：「可能我私底下嘅用詞偶爾會有鄉下話（粗口），所以麻甩。」

至於搞笑的Bob，其上榜宣言則「麻甩不足，搞笑有餘」：「對於有人覺得我喺鏡頭前係高質，我係表示震驚但係歡迎嘅；我真人麻甩到咁都竟然攞唔到第一名，我係表示極度失望同遺憾嘅！」「記恨」的Bob更笑言對於上次「大胃王」一役輸給陳嘉佳（細細粒）已相當唔忿氣：「嗰次攞唔到第一名，我已經好唔開心㗎喇。」