古巨基囝囝第一次睇騷不停拍手仔 聽到「爸爸爸爸」冧到入心

古巨基與太太陳英雪（Lorraine）一直恨生小朋友，去年3月宣布一索得男，囝囝「古巨B」Kuson現在已接近兩歲，兩夫妻錫仔錫到燶，經常在社交網上載一家三口開心片段。疫情期間，古家一直深居簡出，基仔日前終於「復出」為寺院與香港中樂團一齊表演，並一口氣連唱3首歌。原來當晚太太和囝囝都有去捧場，基仔昨日（15日）上載一段1分12秒的短片，聽見囝囝不停嗌「爸爸！爸爸！」作為爸爸的基仔一定冧到爆！

基仔透露囝囝是第一次看他公開表演，寫道：「古晉匡人生第一次睇爸爸公開表演！！第一次嘅反應，最珍貴，喺屋企聽爸爸唱歌聽得多，但係今次佢一定很好奇點解爸爸會對住咁多人唱？Kuson聽聽吓仲自己主動拍手，睇到呢個畫面我真係冧到入心，媽媽話我唱完之後，Kuson一直叫爸爸Come叫到我落台。」
片段一開始，就見到Kuson由工人姐姐抱住，當音樂響起，古太Lorraine在旁說：「爸爸Singing！」當見到基仔出場，Kuson即手指指台上說：「爸爸！爸爸！」之後改由古太抱囝囝，聽到爸爸的歌聲，主動不停拍手仔，似乎好欣賞爸爸的美妙歌聲，又再不停叫爸爸，Lorraine說：「爸爸唱完歌就嚟。」他即招手說：「爸爸Come。」非常可愛，連好友阿Sa (蔡卓妍）都留言表示：「好sweet呀！」