Coffee搵老公拍「快問快答」片 詐型求婚經過零感動兼最差

林芊妤（Coffee）自轉型拍片教瑜伽做KOL，其網上頻道的訂閱人數高達155萬，近日她搞搞新意思，拍了一條與老公翟志榮玩「快問快答」的片段，整段片笑位勁多，又見到其夫求生慾好強，Coffee更爆出當年老公求婚的過程，語氣雖嫌棄至極，但實則放閃度爆晒燈。
影片中問到「Coffee認為自己做過最感動嘅？」問題，翟志榮認為是求婚，不過老婆就不同意，更大爆因為是最差所以記得，Coffee說：「大家想唔想知道佢點樣求婚？我大住個肚五個月（後更正是三個月）喺屋企，求其喺間房度，無啦啦冇開燈，有啲嘢眨吓眨吓，原來係戒指，仲要跌咗落地，佢執返起，仲跪都唔跪，『嫁畀我啦』，咁樣係最感動？」翟志榮聞言就指個point是老婆記得，不過Coffee就半開玩笑呻︰「我記得係因為最差呀！我人生未試過有男人咁對我，一定唔係呢樣囉，錯！」之後好補充是一些細節位令她感動，例如二人去睇戲，老公就算凍都會將外套借給她而不會取回，還有懷孕期間老公會幫她抬行李篋等，翟志榮反而稱是基本嘢。而二人之後互答對方問題時，似乎靠撞彩，非常搞笑。

Coffee在IG也有留言，她表示透過影片想帶出一段關係之中雙方未必會一百分之百了解對方，也未必能完全認同對方所有看法：「尤其相處時間長了，一開始的熱情更是漸漸失去藥效，而關係也會因時間逐漸熱情減退，不再像當初的美好和激情，然而我認為一段長期的關係中，最重要的是能夠多體諒，站在對方的角度想多一步，接納對方的真實，多去留意對方的優點，而真實的生活本來就是沉悶沒趣，找到一位願意跟自己無聊過日子，接受你的個性和缺點，其實也是很難得的對嗎？願大家跟另一半長長久久。」