林芊妤囝囝3歲生日 「伯伯」為一支蠟燭又喊又笑

林芊妤（Coffee）經常喺社交平台分享囝囝「伯伯」翟德彥嘅有趣日常，聰明伶俐加上表情多多，獲唔少廣告商青睞，人氣拍得住Lucy妹妹。

噚日係「翟伯伯」嘅3歲生日，Coffee邀請咗好多家長同小朋友一齊開生日派對，伯伯以《Paw Patrol 汪汪隊立大功》嘅造型登場，十分醒目。伯伯以前都有開個人IG賬戶，有睇開嘅朋友都知伯伯好鍾意吹蠟燭，無論邊個生日，蠟燭在前都會忍唔住「吹吹吹」熄佢。

今次雖然係男主角，但同場有好多天真爛漫嘅小朋友，喺Coffee上載嘅片段中可見，原本係伯伯專屬嘅吹蠟燭環節，竟然出現好多小朋友一齊爭，其中以吳日言囡囡最進取，搞到伯伯扭計爆喊，Coffee笑問吳日言：「可唔可以stop吓你個女呀？」場面爆笑，最後一支蠟燭保守估計吹咗5、6次咁多。

Coffee留言：「嗱嗱嗱～今次真係你都有今日啦！成日吹我蠟燭啊啦🤣#小朋友真係好鍾意吹蠟燭。」佢仲扮伯伯留言：「Wt??你唔係女仔我早就出手啦。」之後Coffee再貼一家三口相，好感觸咁話：「3歲生日!!朋友都知道我這個人沒什麼儀式感，所以節日都是隨心過，BB出生後也沒請過朋友開派對，但今天是Bb的3歲生日～感覺他長大了很多也懂事了。所以我認真地搞了場大龍鳳討他歡心，奔波勞碌了一整天，但看他那麼興奮就覺得值得啦，但三年才搞一次好了🤭😂。#果然是母親受難日😂#我需要幾天的休養啊」不過伯伯超開心，仲講明：「很開心很開心🤩以後年年都要這樣過！」