姜濤預告出紀錄片重提暈倒情緒波動 揭露真性情預惹人討厭

MIRROR人氣王姜濤，早前透露將會推出「九胎」，即第9首單曲，令一眾「姜糖」（fans暱稱）十分期待。姜B昨晚（3日）IG貼出短片，當中透露會製作紀錄片，希望籍此讓外界更了解自己，片中見他在球場與人打籃球時爭波爭到發脾氣；此外姜B亦重提當日出席活動暈倒一事及承認自己情緒有不穩的情況。

甫開始片中先出現句子「真的我可以有好多種，哩個先係真正一個人。我認識的我會是大家認識的我嗎？」姜B指因沒有甚麼途徑讓大家認識自己，因此唯有透過歌曲去表達，但他想找尋多一個方法令外界了解自己，因此便拍紀錄片。姜B坦言：「可能你睇完呢一段片會唔鍾意我，因睇到原來我唔係你想像中嘅我，唔緊要囉。」之後隨即播出他打籃球時搶波的「兇狠」樣，以及平時整蠱隊友及彈人額頭的百厭情景。

當中姜B言談間透露現在的壓力大了不少，因此要更出力表現；當播出早前出席活動暈倒時，他謂：「唔好諗到我咁脆弱，雖然呢件事搞我到我好脆弱，我知我暈咗，一大班人會話我哋公司同花姐嘅唔好，呢8個月一直同內心一直抗爭緊，一時好似好返啲，一時又唔得，希望第三首歌出嚟嘅時俾到一個答案自己。拍完呢段片唱完呢隻歌，我都仲可能會唔開心，但起碼我知道有個方法，呢隻歌就係嗰個答案。」