向海嵐驚險體驗當一日店長 王賢誌自爆做過酒樓推點心

向海嵐（Anne）與王賢誌（Vinci）齊為代言的保健產品到寄賣店做一日店長，二人當日放下藝人包袱，落手落腳執頭執尾，由搬貨、執貨到上架都親自完成！事後兩人接受訪問，Anne坦言體驗一日店長的過程緊張又驚險：「其實都有少少辛苦啦，因為自己好緊張，當有客人問嘢時要好熟悉產品資料，好驚自己會講錯，同時又好想做成單生意，唔多唔少都有啲壓力。」提到她由產品代言人榮升投資者，Anne表示：「我投入程度好高，代言時已經好了解清楚產品，自己同身邊朋友都覺得呢隻產品有效，加上依家大家對保健品需求大，覺得市場前景唔錯，所以值得我投資落去。」

至於司儀經驗豐富的Vinci自言有一定的口材，售貨時絕不怯場：「我覺得自己係個幾好嘅售貨員，因為我講嘢都有說服力，加上我真係試食過產品，所以客人聽完都好有信心。今日都唔算辛苦，一生人都冇乜機會做店長，我記得唯一一次係為慈善賣二手衫。」原來Vinci讀書時曾在茶樓推點心：「搬貨唔算好操勞啦，我細個讀書時，屋企人移民加拿大開過一間中式酒樓，我有兼職做過『Busboy』傳菜推點心，嗰時仲操勞，所以今日呢啲算係好輕鬆喇！」