獨家丨邱淑貞眼利指實記者:你頭先咪影咗囉 二女陪搵舖53歲近望似4字頭

因為屋企有位被封「最美星二代」嘅20歲大女沈月，令到前性感女神邱淑貞經常出現喺娛樂版，阿女生得靚，全靠有個靚媽媽。今年53歲的邱淑貞仲係好靚同好Fit，最重要冇膠味，呢點非常難得。除咗Keep得好，仲好眼利添。日前下午，靚媽同17歲二女沈日現身銅鑼灣渣甸坊，兩個人望住個智能電話再望街兼手指指，額頭明顯鑿住「搵嘢」兩個字，雖然戴咗口罩，但睇雙眼及身形完全唔似5字頭，攝記回覆，「最多似40歲」。採訪:金泰亨

成為新一代女神嘅沈月透露媽媽平日會分享護膚心得，所以從小就開始護膚，特別是注重眼周肌膚的護理。明晒，難怪邱淑貞對眼仲係咁靚，唔多見眼紋，眼紋深先會顯老，所以護眼真係好重要。

兩母女搵緊嘢
當日下午，紥住妹仔丸子頭，着住淺色恤衫同貼身褲嘅邱淑貞，同着住瑜伽褲的二女沈日坐車喺恩平中心落車。兩母女一落車就向住渣甸坊方向行，邊行邊左右望，去到呢條港島區女人街，兩人左兜右兜都係搵唔到想搵嘅舖頭，阿囡拎電話出嚟望，望完再行多一次都係得個吉。

靚媽心水好清
係咁搵唔係辦法，邱淑貞選擇「路在口邊」問藥妝店門口嘅姐姐，對方回答後，兩母女再行到所搵店舖，原來已經執咗，搵舖行動全程20分鐘，兜咗兩個大圈最後收隊。同時間，邱淑貞喺囡囡耳邊講嘢再指住記者，原來一早被發現，之後靚媽望記者嘅眼神都好凌厲，問佢此行目的?「搵啲嘢。」見佢Hea答得咁緊要，講句「影多少少就走」嚟打完場，估唔到靚媽心水咁清，「你頭先咪影咗囉。」