独家丨邱淑贞眼利指实记者:你头先咪影咗罗 二女陪搵铺53岁近望似4字头

因为屋企有位被封「最美星二代」嘅20岁大女沈月，令到前性感女神邱淑贞经常出现喺娱乐版，阿女生得靓，全靠有个靓妈妈。今年53岁的邱淑贞仲系好靓同好Fit，最重要冇胶味，呢点非常难得。除咗Keep得好，仲好眼利添。日前下午，靓妈同17岁二女沈日现身铜锣湾渣甸坊，两个人望住个智能电话再望街兼手指指，额头明显凿住「搵嘢」两个字，虽然戴咗口罩，但睇双眼及身形完全唔似5字头，摄记回覆，「最多似40岁」。采访:金泰亨

成为新一代女神嘅沈月透露妈妈平日会分享护肤心得，所以从小就开始护肤，特别是注重眼周肌肤的护理。明晒，难怪邱淑贞对眼仲系咁靓，唔多见眼纹，眼纹深先会显老，所以护眼真系好重要。

两母女搵紧嘢
当日下午，紥住妹仔丸子头，着住浅色恤衫同贴身裤嘅邱淑贞，同着住瑜伽裤的二女沈日坐车喺恩平中心落车。两母女一落车就向住渣甸坊方向行，边行边左右望，去到呢条港岛区女人街，两人左兜右兜都系搵唔到想搵嘅铺头，阿囡拎电话出嚟望，望完再行多一次都系得个吉。

靓妈心水好清
系咁搵唔系办法，邱淑贞选择「路在口边」问药妆店门口嘅姐姐，对方回答后，两母女再行到所搵店铺，原来已经执咗，搵铺行动全程20分钟，兜咗两个大圈最后收队。同时间，邱淑贞喺囡囡耳边讲嘢再指住记者，原来一早被发现，之后靓妈望记者嘅眼神都好凌厉，问佢此行目的?「搵啲嘢。」见佢Hea答得咁紧要，讲句「影多少少就走」嚟打完场，估唔到靓妈心水咁清，「你头先咪影咗罗。」