鍾培生請伊健MIRROR被拒 網民：唔係個個林作恨錢恨到唔要尊嚴

鍾培生早前拍片聲稱「林鍾一戰」吸金8位數（以千萬計），又大林作是「聰明仔」配合宣傳策略。日前鍾培生再拍片爆內幕，稱一開始係想邀請人氣偶像炒熱個場：「一開始其實係有搵MIRROR、ERROR，但佢哋Turn down咗！」

當日鍾培生坐住條龍從天而降出場，佢話由細到大都想做皇帝，久不久就會著龍袍，21歲生日都係著龍袍，原本仲構思搵鄭伊健唱《數碼暴龍》增加氣勢，佢話：「現場效果有一條BB龍啱啱出世，跟住噴少少火啦，然後變大，用CQ特效令條龍喺現場飛幾個圈，不過鄭伊健推咗，但我哋都係揀咗好貴嘅特效，本來搵鄭伊健都唔會平啦！」

鍾培生仲話係故意營造壞男孩形象，令拳賽爆發火花，佢覺得上一個代表香港嘅壞男孩係陳冠希，依家似乎就去咗ERROR成員193郭嘉駿身上，但講到尾都係請唔郁。唔少網民就大潑冷水，留言：「唔係有錢大晒」、「鍾生被派檸」、「伊健淨係為錢就唔會推內地真人騷啦」、「唔係個個林作恨錢到唔要尊嚴嘅」等。