吳林峰一度拒唱成名作《樂壇已死》：唔想繼續消費

吳林峰即將開騷，日前他接受TVB娛樂新聞台節目《StarTalk》主播許文軒（Edmond）專訪，大談由七年街頭Busking到走進大舞台開演唱會感受，吳林峰謂：「有機會開賣飛演唱會真係不可思議，街頭表演好free，依家舞台要定流程同訊息，所以有種未試過嘅興奮，而且又有感動，因為今次開騷嘅音樂班底就係以前Busking一齊玩嘅朋友，依家好似達成對大家嘅承諾！」

談到其作曲兼有份演繹的《樂壇已死》，吳林峰說：「我唔想攞呢首歌嘅光環，首歌有好多人一齊投放咗心血，唔係淨係我。去到中期我直情唔想唱呢首歌，我並唔係唔鍾意呢首歌，而係我唔想繼續消費佢，因為首歌個意義大過邊個唱，所以喺心態上我更加唔想大家淨係識我呢首歌，但我開心因為呢首歌多人認識我，我感恩有呢首歌嘅出現。」