陳婉婷濕身拍廣告嗌辛苦 曾被父母鬧唔錫身

前TVB「御用丫鬟」陳婉婷（Hebe），與香珮汶（Monique）、Lina及小豆為其擔任主播的直播平台拍攝廣告，唯當日掛起風球加上連場大雨，令她們狠狽不堪，Hebe坦言由頭濕到落腳，笑指充滿「出水芙蓉」的美感：「其實大會都Call定車接我，但行去上車都搞到我濕晒，攝一攝冷氣即刻頭痛！嚟到現場攝影師都話我似『癲婆』咁，由內到外都濕到滴出水，濕身影相真係好辛苦，好在大家都夠專業好快收工。」

Hebe坦言一早習慣打風開工，笑稱曾被父母鬧「唔夠錫身」：「以前試過拍廠景由掛風球到落波都未拍晒，今次廣告期都好趕，如果Delay都唔知幾時可以集齊咁多人再影，所以都要開工！加上呢排我忙緊電影同電視劇，係開心嘅忙碌，所以唔想浪費呢一日檔期。今朝我都把握時間開Live同網友見見面先出門口，突然多咗好多唔同國籍嘅Fans，特別係英美、東南亞嘅朋友，原來之前拍嘅廣告喺當地刊登咗，所以努力係有回報嘅，更加唔可以比自己停落嚟。」