吳麗珠當年扮前B嫂收律師信 最難忘目擊梅艷芳遇襲

吳麗珠（珠女）近日受訪電台節目《舊日的足跡》，具備極高的「扮嘢」天份的珠女，當年在《歡樂今宵》模仿演藝名人至出神入化，自覺最成功的是扮「前B嫂章小蕙」，珠女憶述：「當年就快出場仲未有頭緒，B嫂佢好靚女，講嘢好斯文，仲有一分鐘出場我先諗起佢嘅大眼睛有少少『對』，於是我做誇張啲啲，出嚟效果好好，笑到佢哋肚痛，我知道後來收到律師信，公司話幫我處理，咁都冇咁驚……」
然後有一次珠女轉做地產，帶客去淺水灣睇樓，業主正是B哥鍾鎮濤和B嫂：「之前我哋係通電話聯絡嘅，我諗佢冇料到我係Agent，我都冇諗過業主喺佢！我最記得嗰一次，見到佢心裏面好尷尬，可能我心有屎！」

今年10月10日是「香港女兒」梅艷芳（阿梅）58歲的生忌，大家都懷念這位一代天后。珠女憶述最難忘1992年5月初那個晚上，如常在《歡樂今宵》收工後去九龍塘的一間卡拉OK玩，就給她遇上阿梅遭掌摑事件。珠女說：「其實佢係俾人『質』咗一拳，我親眼見到，佢當時係由其他房間走入嚟坐低，我哋坐喺附近，嗰個人由另外一間房氣沖沖走入嚟，好似話阿梅唔畀面，我當時都唔知發生咩事，我哋驚到叫走，我冇叫阿梅一齊走，因為我見好似有人幫佢解決同面對。事出突然，我驚到開車都腳軟。後來，九龍城差館叫我哋去落口供，我真係好擔心阿梅。」
事後珠女沒在阿梅面前再提起這事，「知道佢去咗泰國一排，再出返嚟應該已經係解決咗。」珠女大讚阿梅真心地好又夠豪情，平易近人：「我聽羅君左講，佢有事阿梅就送咗一張冇銀碼嘅支票畀佢。我好佩服阿梅，佢嘅離開都有好多延續，佢嘅慈善、佢嘅故事，由4歲一個歌女變成一個搞慈善活動咁成功嘅人，佢冇白活到。」正在向阿梅學習的珠女自爆被好友叫「淘小姐」，因為我經常淘寶，又不介意著二手衫，並多謝汪明荃、狄波拉經常送衫給她。「我依家最擔心就係梅媽，佢年紀大，以前我哋 經常有接觸，始終佢係一個老人家。」