膠戰2丨團隊讚6膠玩得投入 堅持傳承建立香港電視業

由呂爵安（Edan）、岑珈其、魏浚笙（Jeffrey）、劉沛蘅(Hillary）、黃正宜（阿正）和徐浩昌（肥腸），合稱6膠主持的ViuTV綜藝節目《膠戰》，去年播出時大受歡迎，其後宣布添食開《膠戰2》，節目將於明天（10日）播出，日前ViuTV邀請《膠戰》的製作團隧，在《今世做電視》系列中大談全靠公司肯放手，不會墨守成規，令到《膠戰》在低成本製作下仍深受歡迎。

訪問上監製李宏達（阿宏）和編審林文靜（文靜）大讚6膠為節目花了不少心機，又點名讚Edan，阿宏話：「鏡頭後，佢哋都會商量點去玩個game，又會好投入去玩，會好用心去度點樣將自己個性格突出啲，好似Edan成日對Hillary好變態，珈其好似爺爺咁，一嘢被辣㷫！」在大家的商量下，團隊共試玩超過一百五十個遊戲，最後只有四十五個遊戲能拍攝，認真程度實在令人佩服！文靜大爆阿宏要求加入女主持，阿宏笑說：「如果六個都係仔，得佢（文靜）開心，都要其他觀眾都開心先得！」文靜搶答：「明明係佢自己想開心，Hillary係監製自己揀嘅！」之不過靚仔靚女係人都鍾意睇，所以最後找來Jeffrey：「我哋覺得一定要個靚仔，但一定要夠膠嘅，如果唔係會唔好睇，試鏡時發覺Jeffrey真係好膠，同埋佢有種天然呆，試玩啲無聊遊戲嗰時都好認真，係好想贏好認真去玩，夠晒膠！」

不過，兩人覺得高層放手自由度大才是最能成就《膠戰》成績，文靜說 ：「魯暉（魯庭暉）叫我去試呀嘛，我sell畀佢時，佢問我『製作組夠唔夠膠？啲game來來去去都係嗰啲嚟，不過睇你哋點去處理，如果你信得過你班製作組，咁你就去做啦﹗』我之前冇做過綜藝，除咗公司支持，業仔（導演吳繼業）教我要放手畀團隊去試，咁先可以行出一條路出嚟﹗我同阿宏都係傳承業仔，一代一代咁傳落去，去建立香港嘅電視業！」
阿宏亦坦言很幸運加入ViuTV：「呢間公司優點係自由度，佢可以畀你失敗，唔得就再試，失敗咗之後再做好啲！」又指視為師傅的導演業仔：「佢教我做呢行要冇大冇細，唔需要諗佢感受，除咗畀機會放手畀我哋啲細嘅去做，佢亦好有承擔，試過之前啲節目做得唔好，我問我係咪要引咎辭職，業仔話係都佢被解僱先，佢點都去撐住我哋成team！」在訪問尾聲， 業仔坦言千祈唔好當自己係老前輩：「每一個行業一定有新人，新人有新思想，錯咪錯又唔係孭唔起，遇到乜障礙，我去處理，咁先可以令呢行更有生命力，我都要同年輕人學習，唔好當自己係老前輩，咁會唔進步！」