鄭嘉穎《仁醫》戴熊仔帽𠱁細路 寄語馬明：做咗老竇你就明

鄭嘉穎、馬國明、鍾嘉欣及周家怡等主演的TVB台慶劇《星空下的仁醫》，將於本月18日首播，首條充滿視覺效果的宣傳片曝光，以動漫風格及真人實境拍攝，帶出馬明、嘉穎這兩位星際使者肩負拯救人類的使命跟黑暗戰鬥的故事。之後鏡頭轉到手術室場景，穿上醫生袍的兩人推門而入，以熱血mode安慰手術台上的小朋友，期間嘉穎頭戴「七彩小熊帽」𠱁小朋友，相當搶焦！彩蛋部分，馬明問嘉穎：「話我哋勁過超人，會唔會誇張咗啲？」身為人父的嘉穎即回答：「小朋友係要𠱁嘅，第日做咗老竇你就明㗎啦！」

兩人拍宣傳片期間受訪，馬明笑指拍攝手術室戲份不簡單：「手術室嘅戲真係要用好多時間拍攝，時間長過拍打戲，因為要好細緻每個Step都拍晒，亦有醫生監場，每個手勢同Step都唔錯得。」談到二人繼《鐵馬尋橋》後相隔11年再合作，馬明笑言：「同識咗好耐嘅朋友拍，個默契好快會返番嚟。」嘉穎則謂：「佢講咗好耐我哋班演員有冇緣份再拍番一套。如果係就拍喜劇，開心啲，又唔使咁辛苦。」