洪永城跑步慢過孕妻 區永權發片取笑：你有咗呀

洪永城（Tony）老婆梁諾妍（Inez）向來熱愛跑步，即使身懷六甲都照跑。仲有兩個幾月就生得Inez，這日在老公陪同下，相約區永權一起跑步，但Tony就被區永權踢爆跑得慢過大肚婆好多，仲有片為證。
區永權在社交網上載片段，他與Inez等候從後慢跑上來的Tony，及3人來個開心合照，留言：「典解嘅？典解嘅？點解一個血氣方剛，正值壯年嘅大叔，步行速度竟然仲慢過一個靚靚大肚婆？」

片段中區永權同樣笑問Inez：「你依家身懷六甲，但點解都快過嗰位先生嘅？」她即笑謂：「佢都身懷六甲！」待Tony終於走近，區永權再問：「咦先生你有咗呀？」Tony叫他不要將片段Po出來，又謂在後邊睇住老婆，更在貼文下留言：「因為……我要係（喺）後邊睇住佢同埋睇住你，驚你碌落嚟」！Inez亦轉發片段為老公解釋：「佢留力跑波馬（波士頓馬拉松）」。