獨家丨蔚雨芯恨請姜濤做品牌代言人 有感情潔癖唔容易拍拖

28歲蔚雨芯(Rainky)兩年前創辦美容品牌生意做埋生招牌，生意蒸蒸日上，身家狂升。Rainky讚自己好有生意頭腦：「我好有生意眼光㗎，去年公司嘅Anniversary dinner已經搵咗姜濤做嘉賓，𠵱家真係請佢唔起！」採訪：方騫平 攝影：譚壹致

Rainky最近喺TVB《開心大綜藝之暑假玩到盡》大晒水著look，相當搶fo，不過，卻勾起多年前嘅一段不快回憶：「因為我傻更更，監製好想我玩game show，但同隊嘅隊長就係咁撳住我，唔想派我去，好彩個前輩司儀好好(指阿Bob)出手幫我。其實我唔明個女仔用意，可能覺得我有殺傷力啩，除非踩到上心口，我都會退後一步，所以唔會爆係邊個女藝人！」

曾贊助姜濤用減肥產品
入行8年，Rainky近年進軍商界做女強人，美容生意愈做愈好：「只可惜今年受疫情影響搞唔到周年晚宴。哈！好回味去年請姜濤表演，但佢愈嚟愈紅，收天價酬勞我都請佢唔起啦，不過我都樂於贊助減肥產品畀佢，佢喺台灣拍劇期間都有問我點食，不過，佢𠵱家都唔係肥仔。」她強調會努力賺錢，希望有朝一日夠錢請到姜濤做代言人：「𠵱家惟有自己做先。」另問到感情狀況，她坦言多追求者：「仲係單身，我有感情潔癖，唔易同人拍拖。」