內地搞攝影展好友撐場　關楚耀獲傅穎讚大師級

入行15年的關楚耀（Kelvin）一出道獲譚詠麟睇好做接班人，未料2009年在日本捲入藏毒事件，形象插水。早前，他於社交平台上載一段在海南島某大牌檔唱Beyond金曲《海闊天空》短片，結果引來網民寸「撈唔掂」去賣唱，事實上，唱而優則演的Kelvin近年主力中、港兩地飛拍戲，有份演出的TVB劇《智能愛人》上周六（11日）已大結局，而同日他亦於廣州展開為期13日的《畫與影》潮流插畫暨攝影藝術聯展，當中展出了不少Kelvin鏡下的香港。

剛好身在當地的傅穎（Theresa）也有現身撐「關總」場，昨日她於IG貼出合照並留言謙稱：「其實生活中，我好少影自己，自拍都係畀你地（哋）睇，手機入面大部份風景相，不過，我影嘅風景相都係得我自己識得欣賞，哈哈哈哈哈。關總啲相就唔同啦，大師級。」又讚Kelvin多才多藝。之前Kelvin與拍拖5年、比他細11歲的空姐兼KOL女友Joann Law傳好事近．未知「未婚妻」Joann可有到攝影展支持男友呢？