【獨家】戲內糟質馮盈盈要斟茶呵返 關楚耀否認撈唔掂大排檔「賣唱」

關楚耀(Kelvin)終於可以在TVB新劇《智能愛人》發揮所長，因為劇中飾演一位跟他真實性格一樣，口衰衰嘅機械人公司老闆，仲成日鬧爆下屬馮盈盈，Kelvin諗返起都猛話好過癮：「佢叫Fung yy，我就鬧到佢爽yy！」不過，他自爆鏡頭以外會幫Fung yy斟茶、撥扇同印汗，絕對係暖男同事。採訪：方騫平 攝影：梁志明 服裝：PortsV

關楚耀唔怕同「緋聞女王」馮盈盈接觸鬧出緋聞，他解釋呢個係演員同演員之間嘅交流，Kelvin首次同盈盈合作讚不絕口：「佢唔止主持做得好，演技都睇住佢有進步，又有觀眾緣，個人又聰明，真係犀利㗎！咁都幾吸引嘅，不過唔啱我，我個人遲鈍啲唔夠聰明。」睇嚟向女友Joann Law大派定心丸。

𠵱家做乜都係為開心
之前Kelvin女友喺IG貼出一張女Model着婚紗相，寫道：「真係好難揀，條條都咁靚。」似有所暗示，Kelvin解釋只係美麗的誤會，其實同女友有共識，現階段以工作為重，追返過往嘥咗嘅時間，女友都明白同支持，他認真說：「我都冇話要大紅大紫，𠵱家有啱嘅音樂同角色就會試吓，用Enjoy心態去做，演藝圈以外都會做啲自家品牌嘢，仲會衝出去啲唔熟悉嘅地方做推廣搵商機，唔會再有偶包。」提到之前喺IG放出自己一段，喺海南島大排檔唱歌影片，被內地網民關注，留言問他係咪撈唔掂要去「賣唱」？Kelvin笑住解釋：「其實嗰日係做完嘢去慶功，而當地流行畀錢點唱，因為好耐冇上舞台演出，一時興起我畀錢『點』自己唱《海闊天空》，同場加演大合唱搞到氣氛好High，𠵱家最緊要係活在當下。」