【獨家】覺得陳瀅似男人大家好兄弟 張子丰被插死獲讚死得逼真
2021-09-10 00:18 
TVB劇《智能愛人》去到結局篇，由張子丰飾演嘅第5個新型AI亦隨即登場。雖然子丰佔戲唔多，但勝在夠搶戲，甫出場晒肌配合做救生員，然後喺八號風球下落水救人，最後中咗病毒變壞咗死得好慘。平日斯斯文文嘅子丰變身奸人表示好玩：「武指讚我畀鐵通插嘅反應好到位，死得逼真！」 採訪：方騫平 攝影：葉君海 髮型：Alva Lam @HAiR 化妝：Sirming WU @非常作
處男奸角令張子丰相當難忘：「由於出場時要赤祼上身落水救人，為咗出場型啲，用咗兩個月時間操肌、晒燈同埋控制飲食，拍前仲爭取時間做gym及掌上壓谷到盡，都及時操到6塊腹肌㗎！最難忘當時喺垃圾灘取景，我唔小心飲咗兩啖海水，見到周圍滿佈飯盒同垃圾，諗返起都想嘔。」
首演奸角好過癮
對於首做奸人，子丰覺得好有驚喜：「以往做啲斯文正直角色太似做自己，演奸角有更多創作空間，會醒神同好玩啲，死得又轟烈，連武指都讚我反應好逼真，因為今次造型要剷青，《把關者門》監製就搵我做埋黑社會，不過最後都係被亂槍掃死。」另外，談到跟陳瀅緋聞，他強調大家係識咗好耐嘅好兄弟：「佢成個男人咁，可能佢當我係女人似姊妹啩！」兩人都長住過溫哥華所以好投契：「佢咁靚梗係多人追啦！不過我冇同佢傾到感情事。」
關鍵字
最新回應