煮戰丨Ricky徒弟難克服比賽恐懼 菲菲感嘆：好迷失

由西廚張錦祥（Ricky）和中廚黃亞保（保哥）率領12位廚壇精英的真人騷《煮戰》，播出後收視和口碑都不俗，比賽已進入直路，淘汰一半後6強已順利誕生。但當中Ricky的真徒弟菲菲（凌瓏菲）的入圍就似乎受到爭議，事關她在比賽中表現騰雞，要Ricky三番四次提醒，更試過發嬲丟匙羹，但仍能成功晉級。

菲菲昨日在社交網發文有感而發，自認是一個「女人仔」，參加比賽令她很迷失，她寫道：「從來我都只係一個鍾意煮嘢食嘅女人仔，我嘅諗法好簡單，就係盡力煮好每一碟餸，令對方食完可以感受到嗰份幸福嘅感覺！參加比賽，令我變得好迷失，我克服唔到對比賽嘅恐懼，我變咗一個唔識煮嘢食嘅人⋯⋯呢種感覺好難受！我覺得自己好無用，點解阿廚玩親比賽都攞獎，而我就變到好似第一日走入廚房咁懵懂，我真係好弱弱⋯⋯我想講，如果我冇一個咁強大嘅老公，我一定撐唔到到今時今日！」

她感激曾經食過她煮食物的朋友給予機會，但自己不想站在風口浪尖，她續說：「我唔想企係（喺）風口浪尖，我只係一個儍儍嘅人，一心一意為做好一手菜，用食物去傳遞愛，帶俾別人一份幸福！請放過我，我只是一個普通人！」

其實菲菲不是廚師出身，入行前做過記者和電台DJ，有次失戀到Ricky餐廳食飯，感覺到幸福的味道，毅然拜師學廚。之後她和先生經營一間餐廳，有不少城中名人和富豪幫襯，她更曾到甄子丹、吳君如、李克勤、陳豪和杜琪峰的家中下廚，足證廚藝實力；但近年餐廳卻不敵疫情結業。