【思家大戰】主持新遊戲節目 李思捷不論輸贏：一個台玩晒唔好玩

李思捷回巢為TVB全新遊戲節目《思家大戰》擔任監製及主持，首集嘉賓有湯怡、陳家樂、王馨平及泳兒等，今日錄影前舉行拜神儀式。思捷指出《Family Feud》遊戲節目有45年歷史，已有75國家做過，在5年前他已向公司「賣橋」，可惜不成功。

他說入TVB有兩個願望，早年已主持清談節目《今晚睇李》，另一個願望是主持這個遊戲節目。他說：「時代唔同，今次係向曾志偉賣橋，TVB攞到版權，遊戲方式要跟足，每集10位嘉賓爭奪終極遊戲大獎5萬元獎金，而整個節目嘅獎金獎品接近100萬。」

問是否打仗救亡？他說：「唔係，有競爭係好事，一個台玩晒就唔好玩，咁樣先健康。而且呢個世界冇輸贏，成功就值得驕傲。」至於製作費方面，他表示不清楚，不需要睇數最舒服，播出集數要視乎反應，他說：「會做到最好同滿意先推出，做完能夠昂起頭行出門口就夠，收視就要睇天時地利人和。」他笑言今次擔任監製要將BB養得肥肥白白，節目將會在本月29日推出。