【獨家】馬德鐘陳煒齊催婚兼催生仔 湯洛雯祝福黃心穎同泥鯭
2021-08-05 23:56 
兩年前湯洛雯(靚湯)取代黃心穎拍梅小青退休作品《法證先鋒IV》頻頻NG，時至今日靚湯有視帝男友馬國明教路，演技刮目相看。新劇中她以女一姿態和「民選視后」陳煒齊齊鬥戲，靚湯七情上面演技大爆發。有醫生男友愛錫的陳煒分享經驗之談，叫靚湯快啲結婚唔好錯失生仔黃金時間。採訪：方騫平 攝影：梁志明
TVB新劇《雙生陌生人》中兩位女主角湯洛雯同煒哥日前晚上喺九龍城碼頭拍外景，劇情講靚湯為咗營救愛郎馬德鐘，爆樽指向翟威廉條頸，靚湯癲到青筋都現埋，非常入戲！不過，被湯洛雯用糖膠酒樽「行」住嘅翟威廉就帶點淆底，因為靚湯出名論盡，就算喺農莊拍戲都會唔小心踩到斧頭手柄，搞到成把斧頭凌空飛起，好彩就冇傷人。
拍住拖先
曾瘋傳靚湯同馬明本月秘婚，靚湯強烈否認：「我緊接要入新組喇！都係拍住拖先，冇話一定要結婚，都要一啲時間(了解)𠵱家未得住。」靚湯仲自爆同馬明冇交嗌：「我好跳掣，但對手唔係咁，佢冇乜情緒起伏。」煒哥以過來人經歷有感而發，同馬神一唱一和叫靚湯快啲結婚，煒哥話特別唔好錯失生仔呢段黃金時間。馬神話最好攞埋視后雙喜臨門；煒哥附和：「佢咁靚女，生女會好靚。」對於昔日好友黃心穎被影到同緋聞男友泥鯭放狗，靚湯帶點尷尬說：「感情唔講太多喇(祝福佢哋？)我個個都祝福…」至於喺旁邊「食花生」嘅馬神就忍唔住陰陰嘴笑。
最新回應