【頭條獨家】陪楊天宇買零食揀極唔啱　胡子彤悶到拉友人速閃

新一代影壇小鮮肉胡子彤和楊天宇，除了活躍電影及時尚圈外，兩位男神同樣喜歡陽光與海灘，所以特別投契，不單止間中相約出海，日前《頭條日報》記者仲撞到他們一同到銅鑼灣行超市，其間楊天宇似乎有選擇困難症，揀咗半小時先買得幾包零食，悶到子彤都拉埋同行友人提早閃返屋企。採訪：梁志明

當日晚上8時許，一身Casual look的胡子彤與友人、2019全球先生香港代表鄭璟樂（Chace），陪同楊天宇及其友人到時代廣場citysuper掃貨。人稱「震波師弟」的楊天宇穿上白色背心，大晒小麥色壯臂和脹卜卜胸肌，在超市內漫遊揀零食，未知是否打算買返去送酒呢？他似乎對日本佐酒小食較感興趣，如芝士鱈魚、肉乾、魚乾等，可能見楊天宇心大心細唔知買邊款，子彤就拎起一包天婦羅紫菜，並化身Sales落力推薦對方，可惜楊天宇研究咗一陣都係放番原位，無癮的子彤隨即行埋一邊玩推車仔。

閃先穩陣
等極楊天宇都未揀到買乜，悶到瞌眼瞓的Chace又繞埋雙手在店內遊蕩，子彤則尾隨專心聽Message。陪逛約20分鐘，子彤決定跟Chace先行離去，留低慢吞吞的楊天宇與友人繼續逛，最後揀咗幾包零食，再買埋一盒92蚊的家庭裝雪糕，便雙雙畀錢返屋企。