開餐廳牌照一年未獲批被迫停業　張惠雅爆Seed斥代辦公司不負責任

2021-08-05 20:00

前女子組合HotCha成員張惠雅（Regen）去年在長洲開餐廳搞小生意，不過因為牌照問題，已停業兩個月。她昨晚（4日）在其社交網連環出po爆Seed，直斥因代辦出牌的公司成年時間仍未搞掂，就連臨時牌照亦過期，令她相當煩惱。
Regen嬲爆留言：「做一個潑婦都要出post……我個牌照過咗期，事隔申請一年啦，你肯出牌畀我未呀？我兩個月差唔多冇開舖啦，你哋係咪咁唔專業呀？」

Regen指該公司已轉了四、五個人與她接觸，卻一直未有為她處理牌照問題：「我嬲到黐咗線，我本身都夠黐線，頭先收工一睇到個message捉我舖頭賣飯，我兩個月冇開舖喇，臨時牌照都過喇……點做生意啊？白交租都死啦係咪啊？連出牌比錢一間公司搞都可以遇到咁冇責任心……你哋自己跟唔足啲嘢又瀨個客！」不少網民叫她開名，也有人建議她委託律師幫手，與該公司接觸。