【新歌悼念故友】姜濤晒舊照片與Kin約定：你嗰邊等我老咗再過嚟

繼Anson Lo、柳應廷、呂爵安在今個夏天推出新歌後，姜濤將會接力登場，昨晚他在社交平台宣佈推出新歌《Dear Ｍy Friend》， 歌曲是懷念今年初離世摯友Kin，接着姜濤在深夜時份在IG限時動態連發12個post，字裡行間都感受到他對故友的思念和不捨，迅即在網上瘋傳，不過到了今午，姜濤刪除了這些帖文。

在帖文中，姜濤tag了阿Kin的IG，親暱地喚對方「白痴仔」並說：「頭先監製send咗八胎（第八首個人單曲）final version俾我，你聽唔聽到？我盡咗力架啦，以前你成日覺得我啲歌一般，呢隻你滿意啦」、「之前去搵左你家姐了 佢同我講 你爸爸媽媽身體冇也太大問題 雖然仲未肯見我哋 但係你放心有時間我一定會再去探佢哋」、「最近因為你唔喺度 而家打波變咗我打中鋒 原來你以前嘅位置真係好攰 以前應該成日賴你搶唔到籃板」、「你喺嗰邊搵到女朋友未呀 30幾歲人都仲未拍過拖 丟架到」、「頭先先發現原來WhatsApp已經搵你唔到 以前嘅對話紀錄冇晒 不過好彩啲相仲喺度 同你大部份傾偈都係當面」、「MV琴日通宵都拍完啦 我今次搵嘅導演拍野拍得好好 一定整到你好靚仔 你睇吓為咗你拍完MV之後直踩30幾個鐘冇瞓過」、「希望MV出街之後可以親自去你屋企嗰度比佢哋睇 你放心我之後一定會定期去探佢哋 我都同佢哋講話以後有咩幫手即管開口 我同占士一定會盡力幫」

言談間姜濤透露了目前心情：「最近呢真係有啲攰 可能係同身邊嘅人相處得唔係太好 可能係外間成日攞我啲嘢去講 可能係對之後要做嘅嘢冇太大信心 不過好彩占士都成日陪我 同埋我最近都搵返黃泉佢哋 總算覺得私底下多番啲朋友啦」、「呢隻歌 我唔需要有咩太好嘅成績 啲人喺下面評論啲咩啊都唔緊要 最緊要嘅 係呢隻歌你聽到睇到就得啦」，最後姜濤貼上跟Kin的合照感觸道：「疫情完咗之後呢，我就搵其他人一齊旅行㗎啦，你個邊等我老咗再過嚟 等我呀。」

一直以來，姜濤曾講過自己入行前朋友不多，身邊只有兩個知己，同時也是最信任朋友中鋒（Kin）及阿J，當日姜濤參加《全民造星》時，三人齊齊在節目上亮相，到了今年年初，姜濤透露有一次與Kin打完籃球，對方突感身體不適，姜濤立即陪好友入醫院，但Kin病情變差，不幸猝逝，面對喪友之痛，再加上排山倒海的工作，即使心情極為難過，但仍要收拾心情，在人前裝作堅強。

另一方面，下周二（10日）是阿Dee的生日，姜濤特別為好友炮製了一個有三層忌廉的生日蛋糕，阿Dee大讚蛋糕好食，最初坐在旁邊的Alton為了身型拒絕試食，不過蠱惑的姜濤從後突襲餵食，嚇到Alton無奈吞下！