新歌與女殭屍糾纏 馮允謙狂操fit準備半裸騷肌

馮允謙（Jay）最近推出新歌《因愛之罪名》，MV故事延續上一首歌《思念即地獄》，他為追捕女吸血殭屍走到紋身店，二人打起來，女殭屍握住他的頸，互相不忍了結對方生命，最後Jay交出子彈離開。

首次踏足紋身店，Jay坦言一直有紋身念頭，尤其對啤牌中的葵扇A情有獨鍾。他說：「我好喜歡Ace of spages，因為可以代表我對人生嘅諗法，人生好似賭博，好似有人覺得我中文唔叻，點解要返嚟香港參加歌唱比賽？其實我就係想賭一鋪，做人有時要冒險。」今次Jay嘗試新曲風，同時參與作曲和填詞部份，他說：「歌詞意思係講一啲得唔到大眾接受嘅愛情。（你多唔多感情煩惱？）每個人少少都會有，但我唔鍾意講，唔想影響情緒。不過好多朋友鍾意搵我傾，唔一定好大問題，只係想搵人傾訴，我係一個好好嘅聆聽者。」

MV通宵拍攝，期間團隊食完晚餐再食消夜，現場還有大量零食，但Jay非常自律，捧着自備的營養餐盒，只有車厘茄和火雞肉三文治；未埋位時還狂做掌上壓，隨手便拿起八公升大水樽狂舉，手瓜胸肌谷到漲卜卜。他說：「跟營養師餐單差唔多一個月，已經慣咗，唔再掛住Burger和Pizza，好多朋友都話我瘦咗，令我更有動力。我想健康同操Fit啲，所以仲會去做Gym。我細佬喺屋企見我食得少又要做運動，話覺得我好慘。」問幾時除衫讓大家欣賞他努力成果？Jay哈哈大笑說：「最初目標只係想去沙灘游水唔好失禮，不過如果能操得更Fit，可能下個MV會除晒……上衫！」期待Jay派福利。