【好驚喜喎】邀林家謙馮允謙做嘉賓 張敬軒屋企突開直播Live

張敬軒全新廣東作品《Sweet Escape》MV於昨晚十二時首播，為宣傳新歌，軒仔於MV首播前開IG直播與歌迷互動，其後齊齊欣賞MV。MV播完，正當大家以為直播結束時，軒仔表示要為凌晨收看直播的觀眾送上驚喜，無預警舉行線上音樂會《Live at Alberose》，更邀請到林家謙及馮允謙（Jay）合作。

昨晚軒仔在車廂進行IG直播，其後下車走進大宅，推開大門後，突然宣布音樂會正式開始。軒仔首先走進玄關位置唱出官方歌迷會主題曲《懷舊情人》，然後便走到滿佈燈泡的花園與嘉賓Jay合唱《無城有愛》，唱畢後，Jay大讚花園的佈置浪漫感十足，軒仔透露找Jay擔任嘉賓的原因：「因為我好鍾意聽你唱歌，呢個人係黐線，好有熱誠，希望喺不久嘅將來可以唱到你寫嘅歌。」Jay回應，「我唔會放棄！我都希望你可以唱我寫嘅歌。」隨後Jay便唱出《遠在眼前》。

其後軒仔走到客廳，另一位嘉賓林家謙亮相，他坐在鋼琴前演繹軒仔的作品《假以時日》，林家謙問軒仔：「你平時都係咁黑㗎？」反應甚快的軒仔即搞笑表示：「你話我塊面呀？」林家謙解釋是指燈光，十分搞笑。曾有不少網民指二人撞樣，軒仔亦承認：「某啲角度有啲似。」當二人合唱林家謙的作品《時光倒流一句話》前，軒仔戴上一早預備的金絲眼鏡，笑稱：「我哋唔可以令廣大覺得我哋似樣嘅朋友失望。」。最後軒仔穿過飯廳來到禱告位唱出《形影不離》，最後以新歌《Sweet Escape》一曲作結。雖然深夜才開直播，但亦有萬幾人觀看，軒仔完Show後表示已經26小時不眠不休，希望一眾歌迷會喜歡今次送上的驚喜禮物。