Tyrese提出解散轉行做園藝 天堂鳥準備舉行最後一次演唱會

BOP天堂鳥日前接受許文軒主持的TVB娛樂新聞台節目《StarTalk》，大談組合將解散以及舉行演唱會感受。成員Tyrese向其公司及隊友提出解散，他說：「我哋冇不和，完全冇嘢！其實之前有段時間組合有官司，已經有解散念頭，之後轉投新公司，諗住有希望，重新出發，但疫情令我哋卻步，所有嘢停晒！我哋都三十歲，要維持自己生活，就要搵出路。」他坦言做娛樂圈以外的事較容易掌握，現在主持做園藝生意，他說：「畀我嘅滿足感同幕前唔同，例如我拎條橋出嚟，立即有嘢返，所以好享受。(金錢容易返？) 哈哈，唔使講到咁白。生活輕鬆咗，過去成日都擔心生活費，已經舒服咗，而且畀到另一半安全感。」

Gordon直言分開發展屬好事，他說：「呢七年大家太依賴大家，分開發展可以令大家更認識我哋每一位成員。其實今次演唱會我哋都等咗好耐，既開心但又傷感。因為可能真係最後一次！呢排預備演唱會同埋之前參加《盛•舞者》都搵返跳舞嘅初心。呢七年自己有偶像包袱，參加完比賽後放下咗偶包，唔介意企喺人後面Support隊友，其實跳舞就應該係咁。希望可以帶《盛•舞者》嘅隊員上我哋今次演唱會舞台。」

近期忙於拍劇的Lincoln說：「其實未入BOP之前，我係演員出身，原來自己已經放低咗做演員八九年，近排拍劇搵返演員嘅初心，越嚟越鍾意拍劇。今次拍《愛上我的衰神》有好多第一次，包括初吻！」