【狂撳F5撲飛】音樂會優先門票火速售罄 趙學而：聽日先正式公開發售

入行27年的趙學而日前宣佈下月22-23日在九展Music Zone舉行《學而我們的音樂會2021》，門票今日在網上優先發售，有不少fans講到明準備狂撳F5去搶飛，結果門票在短短數小時內售罄。

學而其後轉發留言並說：「今日只係優先訂飛啫，聽日先正式公開發售嘅，大家加油啦！多謝～」其實在開賣前夕，已經有不少人已經打定輸數，覺得自己一定撲飛無望，當時學而表示阿婆一把年紀都未放棄：「正面啲，做人要有希望，決心同堅持，好多時喺人生中會帶嚟驚喜嘅，Good luck，各位！」

最後有fans不負學而所望，成功搶到飛！學而亦有留言：「各位老細，恭喜晒！多謝晒！辛苦晒！各位弟弟妹妹哥哥姐姐叔叔阿姨，到時見！」有fans笑問說：「你又係嘅......起碼都去隔離Star Hall啦，book得個Music Zone玩嘢咩......利申：今朝買到。」學而搞笑地回覆：「乜啫你⋯唔係下下都要玩咁大㗎嘛！」