崔宇植十周年線上Fan Meet 防彈V朴敘俊百忙抽空撐老友

本周一，崔宇植透過直播平台舉行10周年線上粉絲見面會「仲夏夜之夢（한여름 밤의 꿈）」，除咗唱歌，公開絕密童年相外，更邀請了Wooga Family 出席，包括防彈少年團的V、朴敘俊、朴炯植及Peakboy。雖然眾人都有工作在身，如V忙為新歌宣傳，朴敘俊及朴炯植忙拍電影，後者更向劇組請假閃出嚟，令主人翁非常感動，而此次見面會播放量逾100萬次。


崔宇植一見到老友出現，不斷強調「多謝你哋嚟呀」，V睇得出對方好不安，即問他:「你好緊張？」宇植即回應：「我10年來第一次辦見面會！」 對於首次一個人直播Fan Meeting，他仰天大喊「真係好艱辛呀」

崔宇植安排咗問答環節同Wooga Family玩，其中一條問題就係叫眾人估吓崔宇植手機入面用咩名Save朴敘俊個名？冇一個人估中，答案係「朴容圭司機」。崔宇植自爆以前唔識揸車時，經常會call朴敘俊載佢，而朴容圭就係朴敘俊原名，朴敘俊聽完大笑：「你唔打算改嗎？」他表示：「我Save咗超過8年！」言下之意似乎唔係好想改，令其它人大笑。

結束之前，防彈V有嘢講，「大家好，首先非常開心及感謝今日喺度可以留下回憶。今次係我第一次以嘉賓身份出席Fan Meet，謝謝大家的熱情歡迎，7月9日我們(BTS)會推出新曲， 希望宇植的粉絲們也能得到小小的治癒」講完V仔先問宇植，「可以宣傳嗎?」當事人都忍唔住笑出聲。

最最後，V仔老實不客氣，一支箭跑去角落拎走咗部PS5，睇嚟佢睇中咗好耐喎。