【獨家】識唱姜濤Edan嘅歌唔怕OUT 關心妍將「關家姐」咒詛變祝福

2021-07-05 22:19

下年41歲的關心妍（Jade）趁出道20周年重返樂壇，Jade強調性格如新歌《腍》一樣，絕非傳足10幾年的陳年潮文，女網民口中蝦蝦霸霸，留難及投訴售貨員，搞到網友家姐被炒嘅「關家姐」，今時今日，Jade對「關家姐」仍有話說：「我惟有將咒詛變成祝福，多做善事俾人睇到我唔係嗰種人。」採訪：方騫平攝影：譚壹致場地：The Fleming

關心妍推出3首新歌《腍》、親自作曲編曲和監製嘅《愛的告別式》及《原諒的力量》，憑歌寄意，寫下對已故父親嘅恩怨情仇。當年爸爸不負責任離開關媽媽及一對子女，直接影響咗Jade的婚姻及愛情觀，好怕似媽媽咁，一個人搵錢照顧兩個細路，直至遇上老公楊長智才令心態改變，她sweet爆說：「佢唔係一個普通嘅男人，佢似爸爸咁照顧我，提我帶叉電機、消毒機，仲會幫我吹凍食物。」

當年關媽媽要返港搵食，安排兩兄妹喺加拿大求學，長期冇父母照顧，Jade俾人蝦到癲：「好記得中學時喺學校俾人偷咗錢，同校長講又點？都冇人back up，出聲都嘥氣，所以愈變愈腍，細個時好冇安全感，好嬲爸爸㗎！所以《腍》呢首歌有我嘅特性，只係唔了解我嘅人，俾『關家姐』影響咗對我嘅睇法。段潮文俾人鬧足10幾年，提醒自己多行善，畀真實一面大家睇。」另外，Jade好感恩仲有公司欣賞她搵她出歌，她唔怕時下樂壇新人輩出會out咗：「音樂冇分年齡界限，最重要有誠意，我有同陳澤言（CY）喺音樂上交流，哈！我識唱姜濤嘅《蒙著嘴說愛你》、Edan嘅《E先生連環不幸事件》，有機會仲想同林家謙、陳蕾、Serrini合作。」