【獨家】孭母女袋行玩具店各自睇嘢 關心妍𠱁女買玩具好搞笑

月尾踏入42歲的關心妍（Jade）近期動作多多，除了夥孫慧雪和張美妮主持網上節目《靚媽圍爐》外，早前又推出「療癒三部曲」的首支單曲《腍》，上月中更透露為慶祝入行20周年，已入紙申請明年於紅館開騷！雖然忙為新歌宣傳，但Jade都冇忽略愛女楊榮心（心心），早前兩人孭「母女袋」去銅鑼灣行街，其間Jade儼如Sales上身狂𠱁囡囡買玩具。採訪：梁志明

推出新歌的關心妍近日忙於宣傳及教唱歌，不過一唔使開工，她都會長伴5歲女兒楊榮心左右，除了喺屋企一齊讀故仔書、Jam歌玩樂器，早前兩母女又孖住去睇展覽、出戶外做運動；而早前下午3時許，《頭條日報》記者就撞到Jade與着到成身Hysteric Mini的囡囡孭「My Melody母女袋」，去皇室堡的玩具反斗城買玩具，同行仲有工人姐姐幫手推購物車。

唔扭買玩具的小朋友
當日心心好乖女，全程靜靜跟住媽咪邊行邊睇，亦都冇扭買玩具，反而Jade自動波一路Sell買呢樣、Sell買嗰樣，惟囡囡仍無動於衷，搞到Jade都𢱑晒頭。結果，在Jade落足嘴頭極力推介下，成功𠱁掂囡囡買179蚊的Paw Patrol音效玩具；之後繼續逛，不過二人各有各睇，Jade對DIY創作類玩具感興趣，心心只掛住睇至愛的麵包超人系列玩具，之後再揸一揸個麵包超人水泡就行返去搵媽咪。最後逛了1個鐘，擸多一盒199蚊的繽紛歡樂氣球機及一盒199蚊的My Little Pony時尚套裝，畀錢後便落地面上車返屋企。