邀CY一齊Jam歌 關心妍自爆當新人被批踭

關心妍（Jade）為黃丹儀與KB（Kelvin Boy）合作主持的網上節目《MUSIC PANDA》擔任首集嘉賓，並邀「造星神經刀」CY（陳澤言）一齊Jam歌。Jade嫁人後雖然專注照顧家庭，但都有追《全民造星III》，並且非常欣賞CY，兩人⼀起演繹多首經典如《歡樂今宵》、《逼得太緊》、《來夜方長》等。CY為感謝前輩的邀請，特別選唱了Jade的經典作品《放生》。
一向被指歌聲聲線極似陳奕迅的CY，亦翻唱了《忘記歌詞》，一開口神還原主唱感覺。兩人亦分享了參加歌唱比賽加入樂壇的心路歷程，Jade提到當新人時遭其他歌手批踭搶位企，「我好冇用，成日都喺企後面。成日俾唱片公司同事鬧我唔識撈，唔去爭前少少企位。」

KB及丹儀就大爆天王級歌手舊事，丹儀爆金句王曾經講過，「歌唔係用來練」。KB就開名大讚黎天王，指曾經2006年同黎明去美國登台，黎天王開騷前竟然走入樂手房與大家打招呼，留下金句： 「大家唔使緊張，我都唔緊張，你哋都唔需要緊張，因為我手中有咪、心中有歌，我背後有你哋，我哋一齊出去速戰速決！」