【独家】孭母女袋行玩具店各自睇嘢 关心妍𠱁女买玩具好搞笑

月尾踏入42岁的关心妍（Jade）近期动作多多，除了夥孙慧雪和张美妮主持网上节目《靓妈围炉》外，早前又推出「疗愈三部曲」的首支单曲《腍》，上月中更透露为庆祝入行20周年，已入纸申请明年于红馆开骚！虽然忙为新歌宣传，但Jade都冇忽略爱女杨荣心（心心），早前两人孭「母女袋」去铜锣湾行街，其间Jade俨如Sales上身狂𠱁囡囡买玩具。采访：梁志明

推出新歌的关心妍近日忙于宣传及教唱歌，不过一唔使开工，她都会长伴5岁女儿杨荣心左右，除了喺屋企一齐读故仔书、Jam歌玩乐器，早前两母女又孖住去睇展览、出户外做运动；而早前下午3时许，《头条日报》记者就撞到Jade与着到成身Hysteric Mini的囡囡孭「My Melody母女袋」，去皇室堡的玩具反斗城买玩具，同行仲有工人姐姐帮手推购物车。

唔扭买玩具的小朋友
当日心心好乖女，全程静静跟住妈咪边行边睇，亦都冇扭买玩具，反而Jade自动波一路Sell买呢样、Sell买嗰样，惟囡囡仍无动于衷，搞到Jade都𢱑晒头。结果，在Jade落足嘴头极力推介下，成功𠱁掂囡囡买179蚊的Paw Patrol音效玩具；之后继续逛，不过二人各有各睇，Jade对DIY创作类玩具感兴趣，心心只挂住睇至爱的面包超人系列玩具，之后再揸一揸个面包超人水泡就行返去搵妈咪。最后逛了1个钟，擸多一盒199蚊的缤纷欢乐气球机及一盒199蚊的My Little Pony时尚套装，畀钱后便落地面上车返屋企。