Gary最後太極演唱會海報曝光 雷有輝爆呔即場補褲超尷尬

太極樂隊原本去年12月於西九舉行戶外演唱會，紀念成軍35周年，但因疫情只好擱置，延至今年8月移師紅館開騷。太極去年10月已為演唱會拍攝海報，今年3月離世的成員唐奕聰（Gary Tong）曝光於最新發布的幕後花絮照中。
6子當日西裝骨骨有別平時「Band仔」造型，當時Gary預測演唱會舉行時，疫情將會過去，叫Fans準備寫心意卡表達愛意。
鄧建明（Joey Tang）卻說看不慣隊友太斯文，全靠造型師幫忙變靚仔：「因為今次搵咗黎明御用造型師幫手，所以大家都Sharp晒，我唔敢講係『黎明Look』，我只係黎明身邊飛過嘅一隻小雀仔！今次宣傳片都好勁，用埋特技去製作，將我地啲樣變老晒，總之就係負責彈琴就得㗎啦。」
拍攝期間主音雷有輝「爆呔」，要工作人員幫忙「補褲」，場面尷尬：「因為我哋著西裝，啲衫太貼身啦，我執嘢時就聽到一吓聲，就知道出事喇！我都想演唱會可以著到咁靚仔，可以夾兩三首嘅，不過Ricky一定會打鼓打到爆晒衫！」
鼓手朱翰博（Ricky）笑稱：「佢套西裝其實我都有著過，但我Carry唔到嘛，又唔及佢靚仔，一場兄弟讓畀佢啦！今次呢個騷8月7至8日紅館舉行，今次好多朋友嚟支持我哋，到時都可能會Over Run要罰錢。」