太極變身「90後」宣傳紅館騷 鋼琴留白向Gary致敬

太極樂隊將於8月7至8日於紅館舉行《太極RAINBOW AFTER RAIN演唱會》，新一輯廣告以動畫形式進行，眾人的容貌4秒後慢慢變老「36年」，成為真正的「90後」（即90歲後）！
主音雷有輝大爆隊友Ricky（朱翰博）「出蠱惑」，要求設計師幫手出術：「我哋每一個都變晒90歲嘅樣，淨係佢一個人揀張咁後生嘅相，睇落同依家都冇咩分別咁，可能佢都知自己擺唔耐，未必有90歲命啩？其實變老好容易，我哋做少幾次Mask、唔化妝都可能有呢啲效果。」

Joey（鄧建明）就話被自己個樣嚇親，笑言有「趕客」成分，並謂：「今次個騷好多Gary（唐奕聰）生前嘅好朋友都話想幫手，所以好多人都嚟支持。呢一刻我地仲未綵排，但都唔習慣冇咗佢，每一個細節都預佢一份。」片中有4秒是鋼琴，給大家意會及向Gary致敬。
Hi-Fi德（劉賢德）就叫太極Fans積極撲飛，直言未知何時會再搞個唱：「依家世界日日改變，呢個騷都因為病毒延期咗幾次，下次再聚都唔知幾時，可能要到30年後先有機會搞，到時我哋仲未死又行得郁，再唱畀大家聽囉！」