【獨家】亡妻離世1年　父女扶持走出陰霾　黃日華做「跟得老竇」陪女行街

自從愛妻梁潔華於去年5月因病離世後，黃日華（華哥）與女兒黃芷晴便一直相依為命，除了閒時踢波及跟周潤發（發哥）跑山外，他早前又與囡囡一齊學整香薰蠟燭，並成功取得導師證書。屋企剩番兩個人，華哥也特別珍惜父女相處時光，父親節前，二人被《頭條日報》記者撞到於沙田新城市廣場買嘢食，之後「廿四孝爹哋」華哥仲好有耐性，全程靜靜地陪住芷晴揀衫。採訪：譚壹致

上月初踏入31歲的黃芷晴，早前向傳媒透露恨識男朋友，惜至今仍未有追求者埋身，又難怪她會單身嘅，事關除了忙於擺檔賣自家飾物外，近來芷晴都一盡孝順女責任，成日陪伴喺爸爸黃日華身邊，似乎都冇乜機會Date吓異性。日前晚上近9點，一身運動Look的華哥孭住兩大袋DECATHLON戰利品，與戴上帽、穿連身白恤衫的芷晴現身一田掃零食，59歲依舊大大隻的華哥負責推住架車仔，囡囡就專心執薯片，雖然爸爸行得有啲快，但兩人都算合拍。

跟實囡囡
畀完錢，芷晴即幫手拎晒兩大袋嘢食，不過一出門口見到啲蛋糕、餅乾，為食的她又停低手指指，之後仲行埋入舖慢慢睇，華哥就默默跟喺囡囡身後陪逛。結果兜咗一圈都睇唔啱，二人便上3樓GU睇衫，芷晴主攻連身裙，華哥繼續毫無怨言做「跟得老竇」，最後芷晴又入手一條黑色恤衫長裙。滿載而歸的黃氏兩父女，雙雙落停車場會合一名友人取車，臨上車前，華哥先飲啖茶再歎番支煙才離開，睇嚟陪個女行咗成晚好攰吓喎！