【提名人造假】「佛祖」港姐不滿被玩爆 林作解畫:前世見過Kirsten

TVB《2021香港小姐競選》日前進行複試，林作自稱係貎似佛祖及同男藝人羅浩楷撞樣嘅東涌Kirsten(霍韻璇)提名人，由於林作曾揚言Kirsten係信心之選，Kirsten冇得留低，林作再出post話：「我決定眾籌畀TVB，以贊助形式代表港人懇求加個位畀佢進入決賽。如果每人出100元，我哋1000人就會有10萬，1萬人嘅，我地會有100萬。一百萬嘅贊助，我估，佢一定可以喺決賽，帶畀我哋最大嘅歡樂。DM我攞眾籌link吧。幸福，係要自己爭取嘅！」林作講到言之鑿鑿，直至昨晚Kirsten忍無可忍，力斥林作只係冒認她提名人嚟「消費」佢，更指林作提供佢嘅個人資料完全係假，她既唔係19歲，最爆係，連中文名都係林作亂咁嗡，她唔係叫霍韻璇！

Kirsten最介意林作喺網上呼籲眾籌，話要籌一百萬給大會讓她進身決賽，絕對係抽她水，提醒大家唔好付款。Kirsten話唔識林作，她嘅真正提名人係陪佢去面試嘅胞兄，而她係香港出身嘅中、菲、西班牙混血兒，今年22歲，體重132磅。

林作透過WhatsApp接受本報訪問時坦承之前話係Kirsten提名人，其實係講笑，他釋解說:「毫無惡意，真心支持，現在成就偉業，請問該感謝我還是咒罵我？沒有我，有Kirsten嗎！」他更繼續開吓玩笑說:「我歡迎網友指正，本人從來都係玩得好大嘅，但從來無傷大雅，她只是獲得了名氣、榮譽、關注、愛戴，毫無損失！我自此宣佈：Kirsten榮獲《2021年香港小姐競選》『最受矚目小姐獎』！」而林作聲稱，他一分錢都沒有收過。

至於林作點解要揀Kirsten嚟「提名」呢？他哈哈大笑說:「因為佢特別親切，真心有佛氣，一見如故，有如見到佛祖般，第一次就覺得前世見過！」問他將對方改中文名做「霍韻璇」的由來？林作大笑道:「我媽媽提名個女仔叫霍穎璇，於是，我取諧音『霍暈船』，佢似係會暈船，即係迷暈反義詞...點知，啲人照寫『霍韻璇』！」

另一廂，雖然Kirsten無緣進入第二輪港姐面試，但她仍笑晒口透過Lenar Bata名字嘅社交平台拍片答謝大家嘅支持，並感恩喺旅程上有一班粉絲。之後化咗靚妝嘅Kirsten上載另一條自拍片，擺出托下巴及V字Pose，還順便叫大家留意她的音樂平台，心情大靚。