【調教你MIRROR】Edan耳邊講嘢令Ian打冷震 AL獲黃修平讚演技細膩

最新一集《調教你MIRROR》，經理人花姐（黃慧君）希望梁祖堯（祖祖）幫手調教Anson Lo（盧瀚霆、AL），「其實MIRROR嘅成員都唔太了解佢，佢太顧及成員感受反而俾人誤解。」祖祖表示有人指AL「好有禮貌，令人覺得佢唔太真心」，花姐大爆：「我同AL傾過，原來佢小學已經俾老師咁講，叫佢唔好咁虛偽，要真心啲。」花姐指AL「寧願有禮貌好過亂講嘢」的做法竟然令人誤會，兩人覺得好笑之餘又費解，因為AL本性相當善良。

祖祖安排12子上演戲課程，更請到《狂舞派》導演黃修平及電台前DJ鍾雪（鍾雪瑩）做嘉賓，令MIRROR好驚喜。AL表示他與黃修平早前拍廣告合作過，但今次再見面依然好緊張。鏡仔分成6組「情侶檔」演出，姜濤及AL一組，AL演繹女主角，點知出咗門口之後開唔返門令眾人爆笑；姜濤獲祖祖大讚：「佢本能反應幾好，唔使諗都可以直接演，好有創作力，但導演可能未必駕馭到佢。」

Jer（柳應廷）和Frankie（陳瑞輝）一組，途中Jer不斷忘記對白，更要隊友提水，而Frankie的反應令祖祖十分驚喜：「佢有個好好嘅條件，就係唔會質疑對手，完全信任對方。就算Jer唔記得台詞，甚至離開場景走去問隊友，Frankie依然留喺度等待對方。」Stanley（邱士縉）及Edan（呂爵安）一組，唔知後者係咪拍完港版《大叔的愛》仲未抽離角色，竟然哄埋Stanley耳邊講嘢。隊友AK（江𤒹生）睇到勁投入眼甘甘，Tiger（邱傲然）就忍唔到笑，Ian（陳卓賢）直頭打冷震！

此外，Alton（王智德）與Jeremy（李駿傑）、Tiger及AK、Lokman（楊樂文）和Ian合演。祖祖特別喜歡Tiger與Lokman的演出：「鐘意Tiger好實在咁演，個底夠實淨，導演要加嘢都容易啲。Lokman平均值最高，無論專業度、創作能力、集中能力、節奏感、同對手交流嘅能力、真誠度，佢係最平均，而且係平均以上，我會好想同佢呢類演員合作。」最後由Lokman、姜濤及AL進入下一輪，跟鍾雪做對手戲，黃修平指：「做得最細膩同Surprise到我嘅就係Anson，佢真係做到好Feminine（女性化）嘅感覺。」

AL事後笑言：「頭先個演出，冇諗過大家覺得我心底係公主同八婆！」他在第二輪要演回男仔角色，依然自然流露，更沒有甩嘴或忘詞。AL曾擔心自己記不到劇本，又要有起伏，相當有難度，「把握好呢次，每次都當最後一次，要100% Show到Anson Lo有啲咩。MIRROR由12人組成，賣點係12個唔相似嘅人，12塊唔同嘅鏡碎片放埋一齊變完整嘅鏡，係我哋Selling point，但而家好似偏離咗。」

此外，花姐表示姜濤改變不少：「佢好少拒絕粉絲，而且一有兄弟喺身邊就好少願意主動企出嚟，通常都係叫隊長Lokman或副隊長AK做，今次係3年來第一次。」姜濤很慶幸大家一齊勸私追Fans：「呢件事對我、對12個人嚟講係一個里程碑，未敢講係好定壞，但大家係第一次去做呢件事。私追確實影響我哋工作，所以大家對呢件事有意見，一齊做呢件事好有意義。好多時候公司幫手擋，今次離開公司保護，可能呢件事處理得唔成熟、唔夠好，但起碼出發點係好。」

姜濤指Fans行為不當，亦間接影響MIRROR關係：「我真係想MIRROR好，一直唔太會為呢啲事而出聲，知道自己粉絲可能比較多，喺呢個情況下，對兄弟有少少唔好意思。有時我啲粉絲令大家……可能彼此嘅粉絲影響大家關係，所以自己冇特別講，但今次希望令大家知道，其實我好Care大家感受，都Care工作環境。」AL在「梅窩事件」當日突然發燒，要由隊友傍住，他認為是一直壓力太大，又面對私追問題所以身體受不住。