【獨家】祖藍鬧得啱 長期唔識釋放情緒 馮盈盈壓力爆煲拍《逆天》喊戲瞓唔到

2021-06-03 21:00
祖藍鬧盈盈長期唔識釋放情緒,她拍《逆天》更壓力爆煲,搞到拍喊戲前瞓唔到。
祖藍鬧盈盈長期唔識釋放情緒,她拍《逆天》更壓力爆煲,搞到拍喊戲前瞓唔到。

做演員投入感情難,識抽離一樣唔易,壓力有時會大到爆晒煲!馮盈盈最近參加《好聲好戲》,為劇集《巴不得媽媽》配音時喊到豬頭演繹,不單得唔到原本演該角的汪阿姐歡心,指她用錯感情,評判王祖藍更狠批「我好擔心你適唔適合做呢行」、「你嘅壓力蓋過你嘅實力」。其實每次演戲盈盈都畀自己好大壓力,舊年《反黑路甲人》已向《頭條》自爆因壓力,情緒失控收工仍狂喊,而她拍熱播的《逆天奇案》時,原來都試過對住視帝陳展鵬拍喊戲,壓力太大緊張到瞓唔到,睇嚟盈盈要改好啲懶音之外,演技方面都要下啲苦功先掂,唔係隨時搞出個情緒病喎!撰文:杜淑霞 攝影:張詠森 髮型及化妝:Kayo Wang 服飾:LONGCHAMP、THIALH London

祖藍鬧盈盈長期唔識釋放情緒,她拍《逆天》更壓力爆煲,搞到拍喊戲前瞓唔到。
祖藍鬧盈盈長期唔識釋放情緒,她拍《逆天》更壓力爆煲,搞到拍喊戲前瞓唔到。
盈盈笑指今次《逆天奇案》角色「Ana」,聰明機智又大膽同自己幾相似。
盈盈笑指今次《逆天奇案》角色「Ana」,聰明機智又大膽同自己幾相似。


啱啱播完的《好聲好戲》順利由表現穩定的陳自瑤奪冠,而出名懶音勁的馮盈盈雖然年前搵前報幕員羅山教正音,懶音情況改善咗好多,但依然落敗,全因畀自己太大壓力,完全控唔到情緒,汪阿姐都評她,「你感情係好豐富,但好似有少少用錯咗。」祖藍除了狠批她「我好擔心你適唔適合做呢行」、「你嘅壓力蓋過你嘅實力」更爆她為了這場戲配音,竟然由早上開始喊到錄影,其間搞到生人勿近,更指「你嘅壓力大到我都有壓力」,仲話令他懷疑自己應唔該搞呢個節目。



其實盈盈演戲時唔識釋放壓力都唔係第一次,舊年8月播出《反黑路人甲》,盈盈接受《頭條》訪問時,就自爆首度擔正女主角畀自己超大壓力,搞到拍喜劇竟然戲裏戲外都爆喊,「大家開心睇喜劇嘅時候,其實我係喺鏡頭前不停喊,返到屋企背人就流淚啦!喺現場對自己有更大期望又忍唔住喊,唔知係咪我對呢套喜劇太投入,係拍劇以嚟喊得最多嘅一次。」

盈盈為《逆天》學了多種語言及技能,包括:西班牙文、尼泊爾文及泰文,還要學跳泰國民族舞。
盈盈為《逆天》學了多種語言及技能,包括:西班牙文、尼泊爾文及泰文,還要學跳泰國民族舞。
劇集《逆天奇案》中,盈盈飾演來自委內瑞拉的駭客「Ana」,打扮性感又大膽。
劇集《逆天奇案》中,盈盈飾演來自委內瑞拉的駭客「Ana」,打扮性感又大膽。


正音搵譚嘉儀學唱歌


講到最近的新劇《逆天奇案》,盈盈一樣畀壓力影響住,首度去泰國北碧府拍外景,面對陳展鵬演喊戲已搞到她超緊張,「最難忘嘅一場戲,喺泰國嘅外景,講我哋喺條火車橋上面,喺日出初起嘅時份,我同展鵬一場好重要嘅情感戲,我又喊佢又眼濕濕,總之好似攤牌咁嘅嘢,拍嘅時候要就埋個日出喺後面,晨早4點要到現場,你估我要幾點化妝!?冇瞓咁滯,前晚又好緊張講到場戲咁重要!」盈盈坦言日出時間太短,要一take過完成唔容易,「工作人員好早去set晒嘢,又特登截住條橋,嗰條橋係有火車經過,喺外地拍攝時間好緊迫,所有嘢都係錢嚟,咁多人力物力好龐大,嗰吓表演要好準好到位。成唔成功?係成功嘅,出嚟個話面仲好靚,有晒景同火車,喊得出真淚水嚟唔係眼藥水嚟。」盈盈又爆另一個緊張位是怕阻住人收工,「嗰場戲係泰國外景最後一日,嗰日展鵬拍完就走得,Phoebe(太太單文柔)都過咗嚟探班,展鵬book晒之後同老婆去曼谷開開心心玩,如果我喊唔出,就耽誤咗時間,阻住人哋去旅行玩都有啲壓力嘅。」



懶音改善咗盈盈,更自爆終於夠膽搵譚嘉儀學唱歌,「我喺選美之後都有學過唱歌,但係好快放棄咗,因咬字未搞掂,唱容祖兒《世上只有》第一句就係『望着你講』,4個字有3個字好難,唱咗一個月都仲係呢四個字,好灰心放棄咗,依家就唔使咁多心機去搞掂字,可以學吓啲keep到啲音準同拍子。」不過她預告會挑戰鄭欣宜首《@princejoyce》,「中間都難有啲位好高音㗎!希望大家可以期待吓我個成果唱成點啦,最難係個beat,希望出到嚟唔會變笑片。」不過盈盈學正音同唱歌之餘,似乎更加需要學好演技,學祖藍話齋情緒能收能放先至算係好演員。



除了這場戲難,今次《逆天》盈盈為了來自委內瑞拉的駭客「Ana」角色,要連學多種語言,「呢套劇簡直係考我語言天才,話我喺外國返嚟同外國人又要講英文,要講到好似外國返嚟ABC咁,仲要學西班牙文又要唱埋歌,講我搵咗位尼泊爾朋友,去到拍攝現場又要加幾句尼泊爾文,即場跟住學要好流利好地道,仲有學泰文,因為去泰國拍外景,我同嗰度啲人溝通係講泰文,仲要識跳埋佢哋啲民族舞,我練咗幾堂先至飛過去,所以我為咗呢套戲學咗好多新嘅語言同新技能,好似去咗個訓練營係度挑戰自我。」

為了要拍到日出背景,劇組要晨早到現場開工。
為了要拍到日出背景,劇組要晨早到現場開工。
在泰國北碧府火車橋拍這場喊戲,搞到盈盈緊張到瞓唔到。
在泰國北碧府火車橋拍這場喊戲,搞到盈盈緊張到瞓唔到。
盈盈笑指怕阻住陳展鵬收工,因單文柔當日都有到場探老公班。
盈盈笑指怕阻住陳展鵬收工,因單文柔當日都有到場探老公班。
拍完《逆天》外景,盈盈都有留在泰國度假。
拍完《逆天》外景,盈盈都有留在泰國度假。
盈盈在《好聲好戲》為劇集《巴不得媽媽》配音時,比起汪阿姐原裝演喊得更勁。
盈盈在《好聲好戲》為劇集《巴不得媽媽》配音時,比起汪阿姐原裝演喊得更勁。
祖藍更狠批盈盈,「我好擔心你適唔適合做呢行」。
祖藍更狠批盈盈,「我好擔心你適唔適合做呢行」。
配完音盈盈仍喊到收唔到聲,祖藍指她唔識收起情緒「壓力蓋過實力」。
配完音盈盈仍喊到收唔到聲,祖藍指她唔識收起情緒「壓力蓋過實力」。
盈盈拍《反黑路人甲》時,已出現控制唔到情緒情況。
盈盈拍《反黑路人甲》時,已出現控制唔到情緒情況。
盈盈年前搵前報幕員羅山教正音,懶音情況改善咗好多。
盈盈年前搵前報幕員羅山教正音,懶音情況改善咗好多。
關鍵字

最新回應

關鍵字

相關新聞

熱門文章