完Show放肆一週狂打邊爐 江𤒹生笑阿Jer唔開騷唔操

今日，MIRROR成員江𤒹生（Anson Kong）在西環拍攝跑步活動宣傳片，他透露中學時曾挑戰跑3000米，奈何用錯短跑方法，最後5個圈只能「行完」。

AK完成六場MIRROR騷後放肆了個多星期，期間狂打邊爐，好彩腹肌仍健在，最近也開始復操，皆因明年初要在劇集中騷肌。AK指閒時有約Alton、Frankie及Anson Lo等做Gym，但要約齊MIRROR甚有難度，笑言擔心齊人做Gym會惹來騷動。他說：「最叫唔郁是姜濤、Jeremy就行動力低，阿Jer唔開騷都唔操嘅，哈哈！（Ian話遺憾冇份騷肌。）原本佢有份㗎，拍《男排女將》時已經操好副偈，開騷前也有操，只是調了Rundown才取消，其實Ian都好鍾意露！（Ian自稱守身如玉㗎！）佢咪扮嘢啦，希望下次大家可以一齊除衫！哈哈！」

此外，談到姜濤近日在社交網站放負，AK表示MIRROR隊友均有短訊關心，希望大家給予姜濤時間及空間去消化與沉澱。他說：「咁細個小朋友要面對這些難關不容易，所以大家都明白，短訊覆不覆也可以。」