【神蹟呀】MIRROR開騷成功召喚 古巨基放低個仔出關睇Show

古巨基（基仔）於14年跟Lorraine（陳英雪）結婚，囝囝古晉匡(Kuson)於19年出世。自疫情爆發以來， 基仔都好小心，試過幾個月冇出過門口，唔出街自然零感染，同時又可以密切見證囝囝成長。


不過，港產天團MIRROR竟然可以令古巨基出門口。昨晚，基仔竟肯暫時放低個仔，現身九展欣賞MIRROR演唱會第五場，睇完更在社交網貼上合照，留言大讚MIRROR:「從素人開始，短短兩年多的時間，能做到這種壓台感和高質演出，是要花多少倍的汗水和努力才能做到。謝謝你們為樂壇的摩打加入了新電池。滾動。加油。」網民留言:「估唔到你居然為左MIRROR出街！睇黎MIRROR嘅威力真係好大!」

其實基仔一向留意MIRROR，之前Chill Club首個頒獎禮，基仔亦有出Po，「看著大家的演出，讓這個同時作為觀眾亦是歌手的我，對音樂的熱血迅即翻滾。」附圖就係MIRROR。

另外同MIRROR隊長Lokman合演《狂舞派》及《狂舞派3》的BabyJohn(蔡瀚億)和顏卓靈昨晚亦有到場支持，BabyJohn在社交網留言:「朝聖!!!多謝你哋每一位將咁精彩嘅演唱會帶俾我哋觀眾！睇到我熱血沸騰!!看見lokman在台上發光芒，好感動！每一位都有獨特的光芒！」另外關心妍昨晚亦捧場，首場已送花籃賀開Show的她在社交網留言指被MIRROR的力量攻陷了，大讚12子跳得唱得，演得講得，又靚又型又有肌肉又有可愛，期待他們在紅館演出。