帶小豬比去樂園玩兼Staycation　單文柔同陳展鵬影到囡囡謝晒皮

疫情持續1年多，不少人為了一止旅行癮都會選擇Staycation，本月19日才踏入31歲的單文柔（Phoebe）都唔例外，近日同老公陳展鵬及囡囡「小豬比」陳諾瑤，去了迪士尼玩足兩日一夜。昨晚，Phoebe於社交網貼出一家三口在樂園玩樂的影片，並寫道：「Our first staycation at Disneyland! We had a lot of fun in daytime and a good rest at night. Thanks for having us and filling up our tummies with nice food.（我們在迪士尼Staycation的第一次！我們在日頭玩得好開心，晚上都有好好休息。感激邀請我們，並以美食填飽我們的肚仔。）」

片中，兩歲的小豬比俾媽咪抱住企喺旋轉木馬前，一齊揸住支米奇造型燈棒Fing Fing吓，未知是否玩咗成日好攰，小豬比個樣勁眼瞓，好似唔知發生咩事咁，但戴住米奇耳仔頭箍的Phoebe就笑得好燦爛，睇嚟媽咪玩得仲開心過囡囡；入到小豬比至愛的「小小世界」，坐在展鵬大腿上的小豬比都即刻活潑番，仲同爸爸睇到拍晒手仔。

見展鵬孭住部數碼相機，估計今次啲靚相及影片都係由他操刀，平日常以愛女充當模特兒，為對方拍下成長紀錄的他，當日應該也替小豬比影了不少寫真，搞到Phoebe都忍唔住於IG Story貼出囡囡一臉無奈的照片，並搞笑扮小豬比口脗寫道：「你同爹哋影完相未？我坐吓先！」消耗了一日體力，小豬比回到酒店即食碗大白飯充飢，為食的她大啖大啖咁扒，仲食到面珠、手仔都黐晒飯粒，十分可愛！