【獨家】離開效力8年TVB想自己話事 45歲蝦頭擇偶要有鬚似陳豪

楊詩敏（蝦頭）喺TVB劇集《愛美麗狂想曲》好搶戲，劇中飾演Kiki有唔少男伴，又帶埋李佳芯等人去餵「鴨」縱慾！由於同現實中保守性格好唔同，蝦頭話過足戲癮，笑言多謝監製賞賜，惟一可惜係Man爆嘅陳豪同李佳芯一對！45歲未有拖拍嘅蝦頭期望搵到個細心又有型嘅「翻版陳豪」做男友。採訪：方騫平 髮型：Ivan Lee @ Headquarters 場地：abc> Studio

蝦頭喺劇中嘅角色大膽出位，由於與Baby Baby（Patrick Sir）遲遲都未能突破超友誼關係，搞到慾火焚身，酒後亂性同相識多年嘅好友蘇澤基（曹永廉）搞埋，唔止戲份重，演得相當有「火花」！

一講男人就興奮
蝦頭好滿足：「做呢啲角色好正呀，好feel free！但其實我本身好文靜、好斯文，對感情好專一，只能愛一個，仲係聽晒男友話嘅屈就家嫂型，不過被上次經歷(同前度經理人邵子風)有所啟發，咁樣係好唔健康嘅做法，要共同成長，互相欣賞先可以長久。」蝦頭表示學懂愛錫及做好自己，「咁樣自然會吸引到一啲識得欣賞我嘅人，我都吸引到小貓3、4隻㗎！」蝦頭愈講愈興奮，佢話自己最like留鬚，陳豪嗰類型嘅男人，「真係佬味十足，陳豪都知我係佢鐵粉，對住佢心心眼，我哋坐埋會研究演技，哎呀！應該叫佢介紹型男畀我識啦！」

對被TVB重用為何仍堅持離開？蝦頭坦言疫情下停工，促使她要主動出擊，趁有氣力成立工作團隊做老闆，加入獨有嘅幽默感或音樂、演戲元素拍網上短片或舞台劇，甚至創出新模式呈現畀觀眾睇：「我好似傻妹咁要闖七關，好相信傻人會有傻福。」